पूर्ण समानुपातिकमानिर्वाचन प्रणाली जाऊँ : अध्यक्ष प्रचण्ड

नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ ले अहिलेको गलत निर्वाचन प्रणालीका कारण जनताका प्रतिनिधिले कहिल्यै निर्वाचन जित्न नसक्ने अवस्था आएको बताएका छ्न ।

उनले यसको परिवर्तन जरुरी भएको उल्लेख गर्दै भने ‘अब पूर्ण समानुपातिक निर्वाचन प्रणाली जरुरी छ’, दाहालले भने, ‘त्यसका पक्षमा हामी लाग्नेबित्तिकै गलत प्रणाली उल्ट्याउन सकिन्छ।’

अहिले देखिएको विकृति र विसङ्गतिका विरुद्ध सङ्घर्ष गर्ने प्रणालीको विकास युवा तथा विद्यार्थीले नै गर्नुपर्ने उल्लेख गर्दै उनले सबैले त्याग गर्दा मात्रै देशमा जनताले खोजेको जस्तो परिवर्तनको अनुभव गर्न सकिने स्थानमा पुर्‍याउन सकिने बताए।
नेकपा माओबादी केन्द्रको भत्री संगठन अखिल (क्रान्तिकारी)को २२औँ राष्ट्रिय सम्मेलनलाई उद्घाटन गर्दै प्रचण्डले यस्तो बताएका हुन ।
उनले प्रतिनिधिसभा विघटनका पछाडि माओवादीले ल्याएको परिवर्तन उल्ट्याउने षड्यन्त्र भएको बताएका छन्।

माओवादीलाई घेरा हाल्ने र सिद्धयाउने रणनीतिअनुसार नै प्रतिनिधिसभा विघटन गरिएको उनले बताए।
माओवादी रहँदासम्म परिवर्तनका एजेण्डा कायमै रहने भएका कारण प्रतिनिधिसभा विघटन गरिए पनि आफूहरुले त्यसलाई परास्त गरेको उनले उल्लेख गरे।

क्रान्ति नछाड्ने सङ्कल्पसहित आफूहरु आन्दोलनमा उत्रिएकाले प्रतिगमन परास्त भएको उनले उल्लेख गरे। अध्यक्ष प्रचण्डले संविधान विरोधी गतिविधि परास्त भएको उल्लेख गरे । उनले आफूसमेत मिलेर गठन गरेको पार्टी गलत दिशामा गएर जनताका अधिकार उल्ट्याउन खोजिएकाले प्रतिवाद गरेको बताए।

अध्यक्ष प्रचण्डले माओवादी पनि अन्य राजनीतिक दल जस्तै हुने चिन्ता भएको बताउँदै दाहालले आफूले जो जसलाई मन्त्री बनाए पनि गलत बाटोमा लाग्नु जस्तो विचित्र अरु केही नभएको बताए।

विगतमा सङ्घर्षका लागि अग्रमोर्चामा जाने प्रतिस्पर्धा हुने गरे पनि अहिले मन्त्री पाइएन, पद पाइएन भनेर रुवाबासी गर्ने प्रतिस्पर्धा चलेकामा उनले गुनासो गरे।