कांग्रेस निजगढको वडा अधिबेशनमा मेयर खनाल नै क्षेत्रीय प्रतिनिधिमा पराजित

नेपाली कांग्रेसको १४औँ महाधिवेशनका लागि भएको क्षेत्रीय प्रतिनिधि छनोटमा निजगढ नगरपालिकाका प्रमुख सुरेश खनाल पराजित भएका छन् । सोमबार भएको वडा अधिवेशनको चुनावमा मेयर खनालसहित उनको प्यानल नै पराजित भएको हो ।

खुला क्षेत्रीय प्रतिनिधिमा ६ जनाको लागि भएको निर्वाचनमा प्रमुख खनालले ३३ मत ल्याएर ७ औँ भएका हुन् ।
वडा अधिवेशन तथा क्षेत्रीय प्रतिनिधि छनोटमा संस्थापन पक्षले प्यानल नै आफ्नो पक्षमा पारेको छ । संस्थापन पक्षका बारा जिल्ला संगठन विभाग प्रमुख शम्भु बुढाथोकीको प्यानलले वडा सभापति पनि भारी मतले जितेको छ ।
उनका प्यानलबाट सागर लामाले ४० मत ल्याएर वडासभापति जित्दा मेयर सुरेश खनाल पक्षका उम्मेदवार विरेन्द्र श्रेष्ठले २१ मत पाएका थिए ।
मेयर खनाल कांग्रेस र माओवादी गठबन्धन भएर मात्र एमालेका उम्मेदवार लाई हराएर चुनाव जितेका थिए । क्षेत्रीय प्रतिनिधिमा शम्भु बुढाथोकीले सर्वाधिक ४३ मत ल्याएका थिए ।