कन्टेनर चढेर आएका यात्रुलाई बीरगजमा क्वारेन्टाइनमा राखियो/चालकलाई कारबाही गरिने

बीरगंज १२ चैत
देशमा भएको लकडाउन उल्लंघन गरेर काठमाण्डौबाट मालवाहक लरीको खाली कन्टेनर भित्र बसेर वीरगन्ज आएका ५२ जना यात्रुलाइ प्रहरीले नियन्त्रणमा लिएको छ ।

काठमाण्डौबाट भरतपुर, हेटौडा हुदै वीरगन्ज स्थित घण्टाघरमा गएराति १२ बजे आइपुगेको ना ५ ख ९५५२ नम्बरको लरीको खाली कन्टेनर भित्र रहेका ३ बालबालिका सहित ५२ यात्रुलाइ प्रहरीले नियन्त्रणमा लिएको हो । प्रहरीले लरीका चालक शीवनारायण महरालाइ पनि नियन्त्रणमा लिएको छ ।

काठमाण्डौको सतुंगलमा रहेको टायल इन्जिम हार्डवेयरमा अल्मुनियम झारेर मङगलवार साँझ वीरगन्ज फर्किने क्रममा लरीमा रहेको खाली कन्टेनर भित्र काठमाण्डौ , भरतपुर , हेटौडाबाट ती यात्रुहरु चढेका थिए । प्रति व्याक्ति २ सय रुपैया भाडा दिने शर्तमा चालकले आफुहरुलाइ लरीमा चढाएको यात्रूहरुले बताएका छन् ।

प्रहरीले नियन्त्रणमा लिएकाहरु बारा , पर्सा र रौतहटका वासीन्दा हुन् । उनीहरु व्यपार व्यवसाय र मजदुरीका लागि काठमाण्डौ , भरतपुर र हेटौडामा बस्दै आएका थिए ।

हिजो देखि लकडाउन भएपछि घर फर्किन अन्य कुनै सवारी साधन नपाएपछि लरीको खाली कन्टेनर भित्र बसेर घर फर्कने क्रममा प्रहरीले नियन्त्रणमा लिएको बारा मोतीसरका रमेश बैठाले बताउनुभयो ।

यस्तै भरतपुरबाट कन्टेनरमा चढेका पर्साको मुडलीका सन्दिप कलवारले भने चालकले लरीमा चढाउन नमानेपनि आफुहरुले हारगुहार गरेपछि मात्रै चढाएको बताउनुभयो ।

प्रहरी नियन्त्रणमा रहेका लरी चालक महराले पनि आफुले यात्रुलाइ चढाउन नमानेको भएपनि बाटो नै छेकेर गाडी घेरेपछि बाध्य भएर चढाउनु परेको बताउनुभयो ।

प्रहरी निरिक्षक कुशल बर्तौलाले कन्टेनर भित्र भेटिएका ५२ यात्रु र चालक गरि ५३ जनालाइ स्वास्थ्य परिक्षणका लागि वीरगन्ज भन्सार क्षेत्रमा स्थापना गरिएको क्वारेन्टनाइनमा आज बिहान पठाइएको बताउनुभयो ।

पर्साका सहायक प्रमुख जिल्ला अधिकारी ललीत बस्नेतले लकडाउन उल्लंघन गरि यात्रु चढाउने लरीका चालकलाइ प्रहरी थुनामा राखेर संक्रामक रोग ऐन २०२० र स्थानीय प्रशासन ऐन २०२८ अनुसार हदै सम्मको कार्वाही गरिने बताउनुभयो । यात्रुहरुलाइ भने क्वारेन्टाइनमा स्वास्थ्य चेकजाच उनीहरुको अवस्था कस्तो देख्निछ त्यसै अनुसार निर्णय गरिने उहाले जानकारी दिनुभयो ।